Besteck om naer te maecken een pinasse in der formen hier naer volgenden

(1 - Seite 1)

In den eersten sal de Kiel lanck wesen zesentsestich voeten aertbreekens, sonder de yhlinghe breet zesthien duymen, diepe verthien duymen, voren ende achter naer advenant alle mate der Stede Vlissinghen,het las van t’voorloop acht voeten verschervende,

(2)

Den Voorsteven lanck 28 voeten met vyf voeten bochts met 15 voeten vallens, 14 duymen breet, diepe 21 duymen, de Sponden naer den heysch,

(3)

Den Achtersteven lanck 17 1/2 voeten int loot ghemeten, met 4 1/2 voeten vallens, met 10 duymen bochts,

(4)

Den Stagie balck lanck 14 voeten met 8 duymen bochts onder met gewronghe billen, boven met een schilt naer den heysch, gheschort acht voeten, de Stevens wel beset met haere Slimphoutens wel verschietende,

(5)

De wyte vande Schepe sal wesen 26 voeten, teghen de huyt ghemeten, voren vanden binnencant achterwaerts 18 voeten, wyt 23 voeten, ende achter teghen de Pompe naer des besteders beliefte,

(6 - Seite 2)

De holte vanden oppecant vanden Kiele tot op den ondercant van het coebrugghe op zeventhien voeten aen boort ghemeten, te weten den overloop op elf voeten, ende de coebrugghe op ses voeten, voorts vande coebrugghe opwaerts twee voeten diepe, vast werck met zyn inhout,

(7)

De waranghen zullen diep wesen 10 duymen, ende breet 8 duymen de locgaten te midden op de Kiel, voorts alle het inhout (tot boven wt) naer advenant viercant, alles verschervende dry voeten met vier vrome waranghen dwaers over de pycke ghelecht naer des besteders beliefte,

(8)

De Plancken zullen dick zyn tot het opperste berchout 2 1/2 duymen, voorts van het opperste berchout tot boven wt, twee duymen ghestreken, de weghers van binnen naer advenant ende ghelyck als buyten, alle de plancken met haren haecken op dry inhouten verschervende,